Soll isch jemond was mitbringe

Wie isch noch als Bauleider fa die Omerigooner in Lautre gschafft hab, hawwisch joo misse viel fahre … vunn de Rhine Ordnance Barracks (ROB) aus, uff die Vochelweh, uff die Air Base noo Rommstää, oder die Kapaun Air Station. In unsra Baubuud in de ROB hatte ma e Sekredärin unn e Bauzeichner, der aa fa die viele klänne Sache zuschdänndisch war, die so nääweher oongfall sin.

De Edmund so hatter gehääs is jo nett rauskomm aus de Baubuud, ausser es waa Feieroomt, do hatter nadierlich kenne aa gehe. Ja was wollt isch donn eischentlisch saae. Ai äänes Daags waa isch moo widda uffem Schprung fa noo Rommstää, unn wie isch soo in de Dier funn de Baubud gstonn honn, hawwisch misch nochemoo rumgedreht unn in de Raum gfrooht:“ Konnisch noch jemond was mitbringe?“ Doo ruft de Edmund: „ Mir konnsche e frisch gezapptes Pils mitbringe! Geht klar hawwisch geontwort unn hab misch uff de Wääg gemach.

Uffem Rickwääg bin isch om Obelkreisel abgeboo, unn inn de neckschde Markt rin. Es hat nur e paar Minude gebraucht unn isch hab e schäänes Bierglas gfunn g`hatt ….  E guudi Flasch Bier war a glei gfunn unn ab gings zurick on die Baubuud. Vor de Dier zur Baubuud hawwisch donn die guud Flasch Bier uffgemach unn hab em Edmund e wunnerschäänes Bier ingschenkt. E Tulp hats g´hat wie gemoolt. Isch donn rinn in die Baubuud unn schnurschtracks uff de Edmund zu. Isch habem des Glas hiigstellt unn gsaa: „Edmund, e guuda, loss das schmägge.“

In dämm Moment hett ma e Fodoabbarat gebraucht, odda bessa sogaa e Komera. De Edmund iss ball rickwärts runner g`fall vunn soim Schduhl, wie ra des Bier gsie hatt. Mit allem hedder geräschend awwer dodemit nett. Unn wonn isch mas so iwwerlee, isch glaab er hat nie mähr was gsaat wonnisch die Dier naus bin unn gfrooht hab: „Konnisch noch jemond was mitbringe?“
Ja, so waa des middem Edmund. Fa misch waas e riese Gaudi unn e Schbass …. isch kennt ma heit noch uff die Schängel klobbe, wonn isch doo droo denk.